ຜົນການປະເມີນຄວາມສ່ຽງລະດັບຊາດ ດ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ຂອງ ສປປ ລາວ [ກົດເພື່ອດາວໂຫຼດ]

ບັນຊີລາຍຊື່ຜູ້ທີ່ພົວພັນກັບການກໍ່ການຮ້າຍ ຫຼື ການສະໜອງທຶນໃຫ້ແກ່ການກໍ່ການຮ້າຍ


ຂ່າວສານ ແລະ ການເຄື່ອນໄຫວຕ່າງໆ

ການມາເຮັດວຽກ ຂອງ ທ່ານ ນາງ ລໍເຣັນ ເຮີດ, ຮອງຫົວໜ້າກອງເລຂາກຸ່ມອາຊີປາຊີຟິກ ເພື່ອຕ້ານການຟອກເງິນ, ຜູ້ປະເມີນ ສປປ ລາວ ກັບ ຄະນະກຳມະການແຫ່ງຊາດເພື່ອຕ້ານການຟອກເງິນ ແລະ ສະຫນອງທຶນ ແກ່ການກໍ່ການຮ້າຍ ກ່ຽວກັບ ການກະກຽມປະເມີນຮອບດ້ານ ວຽກງານ ຕ້ານການຟອກເງິນ ແລະ ສະຫນອງທຶນ ແກ່ການກໍ່ການຮ້າຍ ຂອງ ສປປ ລາວ ໃນປີ 2020-2021


ການຝຶກອົບຮົມຂອງ ITMCFM ຂອງຣັດເຊຍກ່ຽວກັບວຽກງານຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ແກ່ ສປປ ລາວ ໃນລະຫວ່າງ ວັນທີ 26-30 ສິງຫາ 2019 ທີ່ ມົສກູ, ປະເທດຣັດເຊຍ.

ສຳນັກງານຂໍ້ມູນຕ້ານການຟອກເງິນໄດ້ເຂົ້າຮ່ວມການຝຶກອົບຮົມຂອງ ITMCFM ຂອງຣັດເຊຍກ່ຽວກັບວຽກງານຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ແກ່ ສປປ ລາວ ໃນລະຫວ່າງ ວັນທີ 26-30 ສິງຫາ 2019 ທີ່ ມົສກູ, ປະເທດຣັດເຊຍ.ການຈັດຝຶກອົບຮົມໃນຄັ້ງນີ້ ຈັດຂຶ້້ນ ເພື່ອເປັນການສືບຕໍ່ໃຫ້ການຊ່ວຍເຫຼືອ ແລະ ຈັດຕັ້ງຜັນຂະຫຍາຍ ບົດບັນທຶກການຮ່ວມມື (Memorandum Of Cooperation “MOC”) ທີ່ໄດ້ເຊັນກັນ ລະຫວ່າງ 3 ອົງກອນ ຄື:ທະນາຄານແຫ່ງ ສປປ ລາວ (ສໍານັກງານຂໍ້ມູນຕ້ານການຟອກເງິນ), ອົງການຄຸ້ມຄອງການເງິນ ເເຫ່ງສະຫະພັນຣັດເຊຍ “Rosfinmonitering” ກໍ່ຄື ໜ່ວຍງານຂ່າວກອງທາງດ້ານການເງິນ (FIU) ຂອງສະຫະພັນຣັດເຊຍ, ແລະ ສູນເຕັກນິກ ແລະ ການຈັດຝຶກອົບຮົມສາກົນຂອງອົງການທີ່ບໍ່ຫວັງຜົນກຳໄລເອກະລາດ ໃນການກວດສອບທາງດ້ານການເງິນ, ສະຫະພັນຣັດເຊຍ (ITMCFM),ໃນການສ້າງຄວາມສາມາດໃຫ້ແກ່ພະນັກງານໃນຂອບເຂດທາງດ້ານກົດໝາຍ ທີ່ພົວພັນກັບການຟອກເງິນ ທີ່ໄດ້ມາຈາກການກະທໍາຜິດຕົ້ນ ແລະ ການສະໜອງທຶນໃຫ້ແກ່ການກໍ່ການຮ້າຍທີ່ໄດ້ເຊັນກັນ.


ການເຂົ້າຮ່ວມກອງປະຊຸມປະຈຳປີຂອງກຸ່ມອາຊີ-ປາຊີຟິກ ເພື່ອຕ້ານການຟອກເງິນ (22th Asia/Pacific Group on Money Laundering “APG” Annual Meeting in Canberra, Australia) ທີ່ຈັດຂຶ້ນໃນວັນທີ 18-23 ສິງຫາ 2019, ທີ່ນະຄອນຫຼວງແຄນເບີຣາ, ປະເທດ ອົດສະຕຣາລີ.

ການເຂົ້າຮ່ວມກອງປະຊຸມປະຈໍາປີກຸ່ມ APG ແມ່ນເປັນພັນທະຂອງປະເທດສະມາຊິກ ແລະເປັນຂະບວນການກອງປະຊຸມຄົບຄະນະບໍລິຫານງານຂອງ APG ທີ່ຈັດຂຶ້ນ 01 ຄັ້ງຕໍ່ປີເພື່ອ: 1)ການພິຈາລະນາແຜນບໍລິຫານ ແລະ ແຜນວຽກປະຈຳປີ 2019-2020, 2).ຜ່ານຜົນການປະເມີນຮອບດ້ານວຽກງານຕ້ານການຟອກເງິນແລະ ການສະຫນອງທຶນໃຫ້ແກ່ການກໍ່ການຮ້າຍຂອງບັນດາປະເທດທີ່ໄດ້ຮັບການປະເມີນ(Mutual Everlution Report“ME”)ໃນໄລຍະປີຜ່ານມາ ແລະ 3)ວຽກງານອື່ນໆ.


ການເຂົ້າຮ່ວມກອງປະຊຸມໃນຄັ້ງນີ້ ສຕຟງ ໄດ້ເປັນປະທານຮ່ວມ (Co-Chair) ກັບປະເທດອິນໂດເນເຊຍ ແລະ ກອງເລຂາ APG ໃນກອງປະຊຸມພາກພື້ນຂອງ ກຸ່ມອາຊີຕາເວັນອອກສ່ຽງໃຕ້ (SOUTH EAST ASIA SUB-REGIONAL COORDINATION MEETING), ພົບປະກັບຄະນະທີມປະເມີນ,ເຮັດວຽກສອງຝ່າຍກັບຄູ່ຮ່ວມງານໜ່ວຍງານຂ່າວກອງທາງດ້ານການເງິນ ແລະ ຕາງໜ້າທະນາຄານໂລກ ເພື່ອຊ່ວຍແນະນຳ, ຖອດຖອນບົດຮຽນກ່ຽວກັບການກະກຽມກ່ອນການປະເມີນໃນສົກປີ 2020-2021 ແລະ ການບໍລິຫານຄວາມສ່ຽງທີ່ເປັນຜົນມາຈາກການປະເມີນຄວາມສ່ຽງແຫ່ງຊາດກ່ຽວກັບວຽກງານການຕ້ານການຟອກເງິນແລະການສະໜອງທຶນໃຫ້ແກ່ການກໍ່ການຮ້າຍ ຂອງ ສປປ ລາວ.ນອກຈາກນີ້, ພາຍໃຕ້ກອງປະຊຸມດັ່ງກ່າວ ສຕຟງ ຍັງໄດ້ສຳເລັດການຮ່ວມເຊັນບົດບັນທຶກຄວາມເຂົ້າໃຈກັບໜ່ວຍງານຂ່າວກອງທາງດ້ານການເງິນ ປະເທດມາເລເຊຍ.


ການຈັດຝຶກອົບຮົມເຜີຍແຜ່ ລະບົບລາຍງານ ທາງເອເລັກໂຕຣນິກ ລະຫວ່າງ ເຈົ້າໜ້າທີ່ພາສີ ກັບ ສຳນັກງານຂໍ້ມູນຕ້ານການຟອກເງິນກ່ຽວກັບ ການແຈ້ງເງິນສົດ, ວັດຖຸມີຄ່າ ແລະ ເຄື່ອງມືທາງດ້ານການເງິນ ຂອງບຸກຄົນ ໃນເວລາເຂົ້າອອກ ສປປ ລາວ.

ສຳນັກງານຂໍ້ມູນຕ້ານການຟອກເງິນ (ສຕຟງ) ຮ່ວມກັບ ກົມພາສີ (ກພສ), ກະຊວງການເງິນ ໄດ້ຈັດຝຶກອົບຮົມເຜີຍແຜ່ ລະບົບລາຍງານ ທາງເອເລັກໂຕຣນິກ ລະຫວ່າງ ເຈົ້າໜ້າທີ່ພາສີ ກັບ ສຳນັກງານຂໍ້ມູນຕ້ານການຟອກເງິນ ກ່ຽວກັບ ການແຈ້ງເງິນສົດ,ວັດຖຸມີຄ່າແລະເຄື່ອງມືທາງດ້ານການເງິນ ຂອງບຸກຄົນ ໃນເວລາເຂົ້າ - ອອກ ສປປ ລາວ ໃຫ້ກັບເຈົ້າໜ້າທີ່ພາສີ ປະຈຳດ່ານສາກົນ.


ກອງປະຊຸມໃຫຍ່ໜ່ວຍກໍາມະບານສຳນັກງານຂໍ້ມູນຕ້ານການຟອກເງິນ, ທະນາຄານແຫ່ງ ສປປ ລາວ ຄັ້ງທີ I.

ກອງປະຊຸມໃຫຍ່ໜ່ວຍກຳມະບານສຳນັກງານຂໍ້ມູນຕ້ານການຟອກເງິນ, ທະນາຄານ ແຫ່ງ ສປປ ລາວ ຄັ້ງທີ I ໄດ້ໄຂຂື້ນໃນຕອນເຊົ້າຂອງ ວັນທີ 26 ມິຖຸນາ 2019 ທີ່ຫ້ອງປະຊຸມ ຊັ້ນ 4 ທະນາຄານແຫ່ງ ສປປ ລາວ, ໂດຍການເປັນປະທານຂອງ ສະຫາຍ ພອນສະຫວັນ ຄຳພາວົງ ຄະນະກຳມະບານຮາກຖານ ທຫລ ແລະ ໄດ້ມີຄະນະໜ່ວຍກຳມະບານ ພ້ອມດ້ວຍສະມາຊິກພາຍໃນສຳນັກງານຂໍ້ມູນຕ້ານການຟອກເງິນທັງໝົດເຂົ້າຮ່ວມ ຈຳນວນ 32 ສະຫາຍ.


ການຝຶກອົບຮົມແລກປ່ຽນບົດຮຽນ ການຈັດຕັ້ງປະຕິບັດ ວຽກງານ ສືບສວນ - ສອບສວນ ແລະ ການດຳເນີນຄະດີ ຄວາມຜິດທາງອາຍາ ກ້າວໄປສູ່ຄວາມຜິດສະຖານການຟອກເງິນ ຄັ້ງວັນທີ 17 - 21 ມິຖຸນາ 2019, ທີ່ ສຳນັກງານຂໍ້ມູນຕ້ານການຟອກເງິນ ຊັ້ນ 07 ຕຶກຕະຫຼາດຫຼັກຊັບລາວ.


ກອງປະຊຸມສະໄໝສາມັນຄັ້ງທີ I ປະຈໍາປີ 2019 ຂອງຄະນະກຳມະການແຫ່ງຊາດເພື່ອຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ (ຄຕຟງ).

ກອງປະຊຸມສະໄໝສາມັນຄັ້ງທີ I ປະຈໍາປີ 2019 ຂອງຄະນະກຳມະການແຫ່ງຊາດເພື່ອຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ (ຄຕຟງ) ໄດ້ໄຂຂຶ້ນໃນວັນທີ 21 ມິຖຸນາ 2019 ທີ່ຫ້ອງປະຊຸມຊັ້ນ IV ທະນາຄານແຫ່ງສປປລາວນະຄອນຫຼວງວຽງຈັນ, ໂດຍການໃຫ້ກຽດເປັນປະທານຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ປະທານຄຕຟງ.ພ້ອມນີ້,ກໍມີບັນດາສະມາຊິກ ຄຕຟງ ເຂົ້າຮ່ວມໃນກອງປະຊຸມ. ກອງປະຊຸມໄດ້ມີການປຶກສາຫາລືຫຼາຍບັນຫາທີ່ມີຄວາມສໍາຄັນຕິດພັນກັບວຽກງານຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍຂອງ ສປປ ລາວ ເປັນຕົ້ນແມ່ນຄວາມຄືບໜ້າໃນການແກ້ໄຂຂໍ້ບົກຜ່ອງ ແລະ ແຜນການກະກຽມການປະເມີນຮອບດ້ານ ສປປ ລາວ ໃນປີ 2020-2021, ກອງປະຊຸມຍັງໄດ້ຮັບຊາບຜົນຄວາມຄືບຫນ້າໃນການຈັດຕັ້ງປະຕິບັດມະຕິກອງປະຊຸມໃນຄັ້ງກ່ອນໂດຍສະເພາະແມ່ນການສ້າງກົນໄກສືບສວນ-ສອບສວນທາງດ້ານການເງິນ, ການດຳເນີນນການປະເມີນການຄຸ້ມຄອງ ຕາມຄວາມສ່ຽງ ດ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ຂອງຫົວໜ່ວຍທີ່ມີໜ້າທີ່ລາຍງານແລະ ການຮ່ວມມືກັບສາກົນກ່ຽວກັບວຽກງານ AML/CFT. ນອກນັ້ນ ກອງປະຊຸມຍັງໄດ້ຮັບຮອງເອົາແຜນກະກຽມການປະເມີນຮອບດ້ານວຽກງານ AML/ CFT ໃນປີ 2020 ຂອງ ສປປ ລາວ, ແຜນຂະຫຍາຍກອບການຮ່ວມມືກັບຜູ້ຄຸ້ມຄອງ ແລະ ພາກສ່ວນດຳເນີນຄະດີ ໂດຍສະເພາະຂະແໜງການທີ່ມີຄວາມສ່ຽງຕໍ່ວຽກງານຕ້ານການຟອກເງິນ ແລະ ການຊ່ວຍເຫຼືອຈາກສາກົນ ໃນການສະໜອງແຫຼ່ງທຶນໃນການສ້າງຄວາມສາມາດໃຫ້ກັບເຈົ້າໜ້າທີ່ທີ່ກ່ຽວຂ້ອງກັບວຽກງານ AML/CFT ອີກດ້ວຍ.


ສຳນັກງານຂໍ້ມູນຕ້ານການຟອກເງິນເຂົ້າຮ່ວມຝືກອົບຮົມ ຫົວຂໍ້ ການຈັດຕັ້ງປະຕິບັດວຽກງານຕ້ານການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍ ຕາມມາດຕະຖານສາກົນ ທີ່ປະເທດ ສິງກະໂປ.

ໃນລະຫວ່າງວັນທີ 03-07 ມິຖຸນາ 2019 ທີ່ປະເທດ ສິງກະໂປ, ສຳນັກງານຂໍ້ມູນຕ້ານການຟອກເງິນໄດ້ເຂົ້າຮ່ວມຝຶກອົບຮົມໃນຫົວຂໍ້: “ ການຈັດຕັ້ງປະຕິບັດວຽກງານຕ້ານການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍ ຕາມມາດຕະຖານສາກົນ ” ຊຶ່ງຈັດໂດຍລັດຖະບານສິງກະໂປ ແລະ ກອງທຶນລະຫວ່າງປະເທດ (International Monetary Fund “IMF”); ຈຸດປະສົງເພື່ອ: ເພີ່ມລະດັບຄວາມສາມາດໃນການຈັດຕັ້ງປະຕິບັດຕາມຄໍາແນະນໍາ 40 ຂໍ້ໃຫມ່ຂອງ FATF ໂດຍສະເພາະຫຼັກການຈັດຕັ້ງປະຕິບັດການກວດກາຫົວໜ່ວຍທີ່ມີໜ້າທີ່ລາຍງານ ແລະ ການບໍລິຫານຄວາມສ່ຽງພາຍໃນຂອງຫົວໜ່ວຍທີ່ມີໜ້າທີ່ລາຍງານ.


ສຳນັກງານຂໍ້ມູນຕ້ານການຟອກເງິນເຂົ້າຮ່ວມຝືກອົບຮົມໃນໂຄງການແລກປ່ຽນຂອງນັກວິເຄາະຫຼາຍຝ່າຍ-ສູນຝຶກອົບຮົມນັກວິເຄາະ ທີ່ນະຄອນຫຼວງກົວລາລຳເປີ, ປະເທດມາເລເຊຍ.

ໃນລະຫວ່າງວັນທີ 29 ເມສາ - 03 ພຶດສະພາ 2019 ທີ່ ນະຄອນຫຼວງກົວລາລຳເປີ ປະເທດ ມາເລເຊຍ, ສຳນັກງານຂໍ້ມູນຕ້ານການເງິນໄດ້ເຂົ້າຮ່ວມຝຶກອົບຮົມໃນໂຄງການແລກປ່ຽນຂອງນັກວິເຄາະຫຼາຍຝ່າຍ-ສູນຝຶກອົບຮົມນັກວິເຄາະ (Multilateral Analyst Exchange Program “MAEP” - Analyst Hubbing Exercise) ໃນຫົວຂໍ້: “ການເຄື່ອນໄຫວຂອງບໍລິການໂອນເງິນດ່ວນ ທີ່ຍັງບໍ່ໄດ້ຂຶ້ນທະບຽນ ແລະ ການໂອນເງິນແບບຮາວາລາ (Hawala) ທີ່ເຄື່ອນໄຫວໜ້າສົງໄສໃນຂົງເຂດອາຊີຕາເວັນອອກສ່ຽງໃຕ້”ຊຶ່ງຈັດໂດຍໜ່ວຍຂ່າວກອງທາງດ້ານການເງິນ ຂອງປະເທດ ອົດສະຕາລີ(AUSTRAC); ຈຸດປະສົງເພື່ອ: ເພີ່ມລະດັບຄວາມສາມາດໃນການວິເຄາະ ແລະ ການແລກປ່ຽນຂໍ້ມູນລະຫວ່າງບັນດາປະເທດທີ່ເຂົ້າຮ່ວມ, ເພີ່ມທະວີຄວາມເຂົ້າໃຈຂອງນັກວິເຄາະກ່ຽວກັບເຄື່ອງມືທີ່ນຳໃຊ້ເຂົ້າໃນການຕ້ານການກໍ່ການຮ້າຍ ແລະ ການສະໜອງທຶນໃຫ້ແກ່ການກໍ່ການຮ້າຍ ລະຫວ່າງປະເທດ ແລະນຳບົດຮຽນດັ່ງກ່າວມາໝູນໃຊ້ໃນປະເທດຂອງຕົນເພື່ອສ້າງຄວາມເຂັ້ມແຂງໃນການຮ່ວມມືລະຫວ່າງບັນດາປະເທດໃນພາກພື້ນ.


ຂະບວນການກິລາມິດຕະພາບບານເຕະ ລະຫວ່າງ ສຳນັກງານຂໍ້ມູນຕ້ານການຟອກເງິນ ພົບກັບ ກົມຕຳຫຼວດສາກົນ, ກະຊວງປ້ອງກັນຄວາມສະຫງົບ.

ໃນຕອນແລງ ຂອງວັນທີ 30 ເມສາ 2019 ເວລາ 16:30 ທີ່ຜ່ານມາ ສຳນັກງານຂໍ້ມູນຕ້ານການຟອກເງິນ “ໄດ້ຈັດຂະບວນການກິລາມິດຕະພາບບານເຕະລະຫວ່າງ ສຳນັກງານຂໍ້ມູນຕ້ານການຟອກເງິນ ພົບກັບ ກົມຕຳຫຼວດສາກົນ ກະຊວງປ້ອງກັນຄວາມສະຫງົບ”ເພື່ອເປັນການ ສະເຫຼີມສະຫຼອງຕ້ອນຮັບວັນກຳມະກອນສາກົນພ້ອມທັງເປັນການຮັດແໜັນຄວາມສາມາຄີຂອງ 2 ພາກສ່ວນໃນການປະສານງານກ່ຽວກັບວຽກງານຕ້ານການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍ ແລະ ວຽກງານອື່ນໆ.


ຂະບວນການກິລາມິດຕະພາບບານເຕະ ແລະ ກິລາ ເປຕັງ ລະຫວ່າງ ສຳນັກງານຂໍ້ມູນຕ້ານການຟອກເງິນ ພົບກັບ ກົມຕິດຕາມກວດກາດຳເນີນຄະດີອາຍາ ອົງການໄອຍະການປະຊາຊົນສູງສຸດ ຮ່ວມກັບ ກົມຕຳຫຼວດເສດຖະກິດ, ກະຊວງປ້ອງກັນຄວາມສະຫງົບ.

ໃນຕອນແລງ ຂອງວັນທີ 05 ເມສາ 2019 ເວລາ 17:00 ທີ່ຜ່ານມາ ສຳນັກງານຂໍ້ມູນຕ້ານການຟອກເງິນ ໄດ້ຈັດຂະບວນການກິລາມິດຕະພາບບານເຕະ ແລະ ກິລາ ເປຕັງ ລະຫວ່າງ ສຳນັກງານຂໍ້ມູນຕ້ານການຟອກເງິນ ພົບກັບ ກົມຕິດຕາມກວດກາດຳເນີນຄະດີອາຍາ ອົງການໄອຍະການປະຊາຊົນສູງສຸດ ຮ່ວມກັບ ກົມຕຳຫຼວດເສດຖະກິດ, ກະຊວງປ້ອງກັນຄວາມສະຫງົບ ເພື່ອເປັນການສະເຫຼີມສະຫຼອງຕ້ອນຮັບວັນບຸນປີໃຫມ່ລາວ ປີ ພສ 2562 ພ້ອມທັງເປັນການຮັດແໜັນຄວາມສາມັກຄີຂອງ 3 ພາກສ່ວນໃນການປະສານງານກ່ຽວກັບວຽກງານຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ແລະ ວຽກງານອື່ນໆ.


ການສຳມະນາໃນຫົວຂໍ້ " Thailand-Chilean Joint Triangular Cooperation Project for ASEAN 2019."

ໃນລະຫວ່າງວັນທີ 25– 29 ມີນາ 2019 ທີ່ບາງກອກ, ປະເທດໄທ ສຳນັກງານຂໍ້ມູນຕ້ານການຟອກເງິນ (ສຕຟງ) ໄດ້ເຂົ້າຮ່ວມການສຳມະນາໃນຫົວຂໍ້ " Thailand-Chilean Joint Triangular Cooperation Project for ASEAN 2019 " ຈຸດປະສົງຂອງການຈັດສຳມະນາໃນຄັ້ງນີ້ແມ່ນເພຶ່ອເພີ່ມທະວີຂີດຄວາມສາມາດ ແລະ ພາລະບົດບາດຂອງໜ່ວຍງານຂ່າວກອງທາງດ້ານການເງິນໃນການປ້ອງກັນ ແລະ ກວດສອບການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ”). ຊຶ່ງຮ່ວມຈັດໂດຍ ກົມຮ່ວມມືລະຫວ່າງປະເທດ, ກະຊວງກະຊວງການຕ່າງປະເທດ, ປະເທດໄທ (Thailand International Cooperation Agency "TICA") ຮ່ວມກັບກົມຮ່ວມມືລະຫວ່າງປະເທດ, ປະເທດຊີລີ (Chilean Agency for International Cooperation "AGCT") ແລະ ສຳນັກງານ ປາບປາມການຟອກເງິນ ຂອງປະເທດໄທ (Anti-Money Laundering Intelligence Office "AMLO").


ການສຳມະນາໃນຫົວຂໍ້ “ການສົ່ງເສີມການຮ່ວມມືການຕ້ານອາຊະຍາກຳຂ້າມຊາດໃນພາກພື້ນອາຊຽນ”.

ໃນລະຫວ່າງວັນທີ 26– 28 ມີນາ 2019 ທີ່ບາງກອກ, ປະເທດໄທສຳນັກງານຂໍ້ມູນຕ້ານການຟອກເງິນ (ສຕຟງ) ໄດ້ເຂົ້າຮ່ວມການສຳມະນາໃນຫົວຂໍ້ “ການສົ່ງເສີມການຮ່ວມມືການຕ້ານອາຊະຍາກຳຂ້າມຊາດ ໃນພາກພື້ນອາຊຽນ” ຊື່ງຈັດຮ່ວມໂດຍອົງການ UNODC ແລະ ສຳນັກງານພາກພື້ນອາຊີຕາເວັນສຽງໃຕ້ ແລະ ປາຊີຟິກ (Regional Office for Southeast Asia and Pacific “ROSEAP”). ຈຸດປະສົງຂອງການສຳມະນາຄັ້ງນີ້ແມ່ນມີຄວາມສຳຄັນ ຊຶ່ງຜູ້ເຂົ້າຮ່ວມຈະໄດ້ຄວາມຮູ້ ແລະ ປະສົບການເບື້ອງຕົ້ນຈາກຊ່ຽວຊານກ່ຽວກັບການຮ່ວມມືກົດໝາຍລະຫວ່າງປະເທດ, ຂັ້ນຕອນການປະຕິບັດລະບົບກົດໝາຍຂອງບັນດາປະເທດອາຊຽນ (ປະເທດກຳປູເຈຍ, ສສ ຫວຽດນາມ, ມຽນມາ ແລະ ອື່ນໆ) ແລະ ການຊ່ວຍເຫຼືອເຊີ່ງກັນ ແລະ ກັນທາງດ້ານກົດໝາຍ (Mutual legal assistance) ລະຫວ່າງປະເທດເພື່ອຕ້ານອາຊະຍາກຳຂ້າມຊາດ ຈາກປະເທດອາຊຽນ.




ການຟອກເງິນ.

ການຟອກເງິນ ແມ່ນ ການປ່ຽນຮູບ, ນຳໃຊ້, ເຄື່ອນຍ້າຍ, ແລກປ່ຽນ, ໄດ້ມາ, ຄອບຄອງ, ໂອນກຳມະສິດທີ່ແທ້ຈິງ ຂອງເງິນ ຫຼື ຊັບສິນອື່ນ ທີ່ ບຸກຄົນ, ນິຕິບຸກຄົນ ຫຼື ການຈັດຕັ້ງ ໂດຍທີ່ຮູ້, ໄດ້ຮູ້ ຫຼື ສົງໄສວ່າ ເງິນ ຫຼື ຊັບສິນນັ້ນ ມາຈາກການກະທຳຜິດຕົ້ນ ເພື່ອປົກປິດ ຫຼື ຊຸກເຊື່ອງ ຄຸນລັກສະນະ, ທີ່ມາຂອງເງິນ, ທີ່ຕັ້ງ ຂອງຊັບສິນ ເພື່ອເຮັດໃຫ້ເງິນ ຫຼື ຊັບສິນດັ່ງກ່າວ ຖືກຕ້ອງຕາມກົດໝາຍ.

ການສະໜອງທຶນໃຫ້ແກ່ການກໍ່ການຮ້າຍ.

ການສະໜອງທຶນໃຫ້ແກ່ການກໍ່ການຮ້າຍ ແມ່ນ ການເຄື່ອນໄຫວໂດຍເຈດຕະນາ ທັງທາງກົງ ແລະ ທາງອ້ອມ ຂອງບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ພະຍາຍາມໃຫ້, ຮິບໂຮມ, ຈັດຫາທຶນ ທີ່ຖືກຕ້ອງ ຫຼື ບໍ່ຖືກຕ້ອງ, ທັງໝົດ ຫຼື ບາງສ່ວນ ເພື່ອສະໜອງໃຫ້ແກ່ການກໍ່ການຮ້າຍ ຫຼື ຜູ່ກໍ່ການຮ້າຍ ຫຼື ການກະທຳທີ່ພົວພັນກັບການກໍ່ການຮ້າຍໂດຍສະເພາະ ເຖິງວ່າທຶນນັ້ນ ຈະຖືກນຳໃຊ້ ຫຼື ບໍ່ນຳໃຊ້ ເຂົ້າໃນການກະທຳຕົວຈິງກໍຕາມ.

ເຊື່ອມຕໍ່ກັບເວັບໄຊທ໌ອື່ນກ່ຽວພັນວຽກງານ AML/CFT.

                   

ສຳນັກງານຂໍ້ມູນຕ້ານການຟອກເງິນ

    ສຳນັກງານຂໍ້ມູນຕ້ານການຟອກເງິນ ແມ່ນ ການຈັດຕັ້ງໜຶ່ງໃນກົງຈັກການຈັດຕັ້ງ ຂອງທະນາຄານ ແຫ່ງ ສປປ ລາວ ແລະ ມີຄວາມເປັນເອກະລາດທາງດ້ານການເຄື່ອນໄຫວວຽກງານວິຊາສະເພາະ.

    ສຳນັກງານຂໍ້ມູນຕ້ານການຟອກເງິນ ມີພາລະບົດບາດຕົ້ນຕໍ ໃນການເກັບກຳຂໍ້ມູນ, ວິເຄາະ, ເຜີຍແຜ່, ປະສານງານ ກັບພາກສ່ວນທີ່ກ່ຽວຂ້ອງ ທັງພາຍໃນ ແລະ ຕ່າງປະເທດ ກ່ຽວກັບການຕ້ານ ສະກັດກັ້ນ ການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ.

    ສຳນັກງານຂໍ້ມູນຕ້ານການຟອກເງິນ ນຳໃຊ້ງົບປະມານຂອງທະນາຄານ ແຫ່ງ ສປປ ລາວ.

    ສໍານັກງານຂໍ້ມູນຕ້ານການຟອກເງິນປະກອບມີ 4 ພະແນກທີ່ເປັນເສນາທິການຊ່ວຍວຽກດັ່ງນີ້:

       1. ພະແນກບໍລິຫານ;

       2. ພະແນກວິເຄາະຂ່າວກອງ;

       3. ພະແນກຕິດຕາມ ແລະ ກວດກາ;

       4. ພະແນກຂໍ້ມູນຂ່າວສານ.

ເພີ່ມເຕີມ

ຈຳນວນຜູ້ເຂົ້ານຳໃຊ້   

visitor counter widget