ກອງປະຊຸມເຜີຍແຜ່ວິທີເກັບກໍາຂໍ້ມູນດ້ານການຟອກເງິນທີ່ຕິດພັນກັບຂະແໜງຊັບພະຍາກອນທໍາມະຊາດ ແລະ ສິ່ງແວດລ້ອມ ໃຫ້ກັບຂະແໜງການທີ່່ກ່ຽວ ທີ່ແຂວງຈໍາປາສັກ ແລະ ແຂວງສະຫວັນນະເຂດ

ຄະນະອະນຸກໍາມະການຮັບຜິດຊອບປະເມີນຄວາມສ່ຽງແຫ່ງຊາດ ດ້ານການຟອກເງິນທີ່ຕິດພັນກັບຂະແໜງຊັບພະຍາກອນທໍາມະຊາດ ແລະ ສິ່ງແວດລ້ອມ (Module 06: ML Risk Assessment on Environmental Crimes) ໄດ້ຈັດກອງປະຊຸມເຜີຍແຜ່ວິທີປະກອບເກັບກໍາຂໍ້ມູນ ໃຫ້ກັບຂະແໜງການທີ່່ກ່ຽວ ທີ່ແຂວງຈໍາປາສັກ ແລະ ແຂວງສະຫວັນນະເຂດ ໃນລະຫວ່າງວັນທີ 21-27 ເມສາ 2024 ແລະ ແຂວງຊຽງຂວາງ ໃນລະຫວ່າງວັນທີ 29-30 ເມສາ 2024. ຈຸດປະສົງຂອງກອງປະຊຸມແມ່ນເພື່ອເກັບກໍາຂໍ້ມູນຮອງຮັບໃຫ້ການປະເມີນຄວາມສ່ຽງແຫ່ງຊາດດ້ານການຟອກເງິນຂອງ ສປປ ລາວ ທີ່ຕິດພັນກັບຂະແໜງຊັບພະຍາກອນທໍາມະຊາດ ແລະ ສິ່ງແວດລ້ອມ, ຊຶ່ງເປັນໜຶ່ງໃນບັນດາເງື່ອນໄຂເພື່ອຊ່ວຍແກ້ໄຂຂໍ້ຄົງຄ້າງຕາມບົດປະເມີນຜົນຂອງ ສປປ ລາວ ຄັ້ງ ທີ II (Lao PDR Mutual Evaluation Report 2023 "MER" ທີ່ຖືກຮັບຮອງໃນ ເດືອນ ຕຸລາ 2023 ທີ່ຜ່ານມາ). ກອງປະຊຸມໄດ້ມີຜູ້ເຂົ້າຮ່ວມຈາກພະແນກກ່ຽວຂ້ອງພາຍໃນຂອງແຕ່ລະແຂວງ ຄື: ກອງບັນຊາການ ປກສ ແຂວງ, ສານປະຊາຊົນ, ອົງການໄອຍະການປະຊາຊົນ, ພະແນກກະສິກໍາ ແລະ ປ່າໄມ້, ພະແນກຍຸດຕິທໍາ, ພະແນກຊັບພະຍາກອນ ແລະ ສິ່ງແວດລ້ອມ, ພະແນກພະລັງງານ ແລະ ບໍ່ແຮ່, ພະແນກອຸດສາຫະກໍາ ແລະ ການຄ້າ, ພະແນກໂຍທາທິການ ແລະ ຂົນສົ່ງ ເປັນຕົ້ນ. ກອງປະຊຸມໃນຄັ້ງນີ້, ພະແນກກ່ຽວຂ້ອງດັ່ງກ່າວຈະຕ້ອງຕອບແບບສອບຖາມ 02 ສະບັບ ຄື: (1) ແບບສອບຖາມດ້ານຄວາມບອບບາງ ແລະ (2) ແບບສອບຖາມດ້ານໄພຂົ່ມຂູ່. ໄລຍະເວລາຂໍ້ມູນທີ່ປະກອບໃສ່ ແມ່ນ 05 ປີຍ້ອນຫຼັງ ຄື: ໄລຍະແຕ່ປີ 2018 ຫາ 2022, ຊຶ່ງຈະເປັນພື້ນຖານໃນການວິເຄາະລະດັບຄວາມສ່ຽງຂອງບັນດາພຶດຕິກຳຂອງການກະທຳຜິດຕົ້ນ ຫຼື ການກະທໍາຜິດທາງອາຍາ ທີ່ຕິດພັນກັບແຕ່ລະພາກສ່ວນໃນຂອບເຂດທົ່ວປະເທດ ເພື່ອໃຫ້ສາມາດກຳນົດພຶດຕິກໍາທີ່ເປັນໄພຂົ່ມຂູມ(ພຶດຕິກໍາສ່ຽງຕໍ່ການກໍ່ໃຫ້ເກີດການຟອກເງິນ) ແລະ ຄວາມບອບບາງຂອງລະບົບຕ້ານອາຊະຍາກໍາທີ່ກ່ຽວຂ້ອງ ທັງນີ້ກໍ່ເພື່ອຊ່ວຍໃຫ້ປະເທດສາມາດປັບປຸງ ແລະ ວາງນະໂຍບາຍ ຫລື ວາງລະບົບຕ້ານຕໍ່ອາຊະຍາກໍາດັ່ງກ່າວໃຫ້ແທດເຫມາະກັບສະພາບຄວາມເປັນຈິງຂອງການຂະຫຍາຍຕົວທາງດ້ານເສດຖະກິດ-ສັງຄວາມເປັນແຕ່ລະໄລຍະ.