ກອງປະຊຸມຝຶກອົບຮົມກ່ຽວກັບ ວຽກງານຕ້ານການຟອກເງິນ ເເລະ ສືບສວນ-ສອບສວນ ການສະໜອງທືນໃຫ້ແກ່ການກໍ່ການຮ້າຍ ຄັ້ງວັນທີ 28-31 ສິງຫາ 2023 ຢູ່ທີ່ແຂວງຈຳປາສັກ

ສຳນັກງານຂໍ້ມູນຕ້ານການຟອກເງິນ (AMLIO), ສະຖານທູດອາເມລິກາ ປະຈຳ ສປປ ລາວ ແລະ ອົງການສະຫະປາຊາຊາດ ເພື່ອຕ້ານຢາເສບຕິດ ແລະ ອາຊະຍາກຳ (UNODC) ຮ່ວມກັນຈັດກອງປະຊຸມຝຶກອົບຮົມກ່ຽວກັບ ວຽກງານຕ້ານການຟອກເງິນ ເເລະ ສືບສວນ-ສອບສວນ ການສະໜອງທືນໃຫ້ແກ່ການກໍ່ການຮ້າຍ ຄັ້ງວັນທີ 28-31 ສິງຫາ 2023 ຢູ່ທີ່ແຂວງຈຳປາສັກ. ໃຫ້ກຽດເປັນປະທານຮ່ວມໂດຍ ທ່ານ ຈິນດາໄມ ວິໄລຫົງສ໌ ວ່າການຫົວໜ້າສໍານັກງານຂໍ້ມູນຕ້ານການຟອກເງິນ ແລະ ທ່ານ ວິນລຽມ ໂຊເລ (Mr. William C.Solley) ຫົວໜ້າພະແນກຕ້ານຢາເສບຕິດ ແລະ ອະຊາຍະກຳ ສະຖານທູດອາເມລິກາ ປະຈຳ ສປປ ລາວ. ຊຶ່ງມີຜູ້ເຂົ້າຮ່ວມທັງໝົດ 21 ທ່ານ ມາຈາກ ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ກະຊວງປ້ອງກັນຄວາມສະຫົງບ ແລະ ສໍານັກງານຂໍ້ມູນຕ້ານການຟອກເງິນ ທີ່ຮັບຜິດຊອບໂດຍກົງກ່ຽວກັບບັນຫາດ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ. ຈຸດປະສົງຂອງການຝຶກອົບຮົມໃນຄັ້ງນີ້ ກໍ່ແມ່ນເພື່ອ ສ້າງຄວາມຮັບຮູ້-ເຂົ້າໃຈ ແລະ ຄວາມອາດສາມາດໃຫ້ກັບເຈົ້າໜ້າທີ່ທີ່ກ່ຽວຂ້ອງ ໃນຂັ້ນສູນກາງ ແລະ ທ້ອງຖິ່ນ ໃຫ້ມີຄວາມເຂົ້າໃຈຢ່າງເລິກເຊິ່ງກ່ຽວກັບວຽກງານດັ່ງກ່າວ ແລະ ເພື່ອໃຫ້ການຈັດຕັ້ງປະຕິບັດຕົວຈິງມີປະສິດທິຜົນຍິ່ງຂື້ນ.

ຮູບພາບເພີ່ມເຕີມ